درود شریف جمع کرنے کے لیے فرشتوں کا دنیا میں سیر کرنا ‏

عن عبد الله رضي الله عنه قال: قال رسول الله صلى الله عليه وسلم: إن لله ملائكة سياحين في الأرض يبلغوني من أمتي السلام (سنن النسائي، الرقم: ۱۲۸۲، صحيح ابن حبان، الرقم: ۹۱۳)

حضرت عبد اللہ بن مسعود رضی اللہ عنہ سے مروی ہے کہ رسول اللہ صلی اللہ علیہ وسلم نے ارشاد فرمایا کہ بے شک اللہ سبحانہ وتعالیٰ کے بہت سے فرشتے ہیں، جو زمین میں پھرتے رہتے ہیں اور مجھے میری امّت کا سلام پہونچاتے ہیں۔

حضرت رسول اللہ صلی اللہ علیہ وسلم کے اسم گرامی کے ساتھ درود شریف نہ لکھنے پر تنبیہ

حضرت حسن بن موسٰی الحضرمی رحمہ اللہ، جو ابن عجینہ کے نام سے مشہور ہیں، کہتے ہیں کہ میں حدیثِ پاک نقل کیا کرتا تھا اور جلدی کے خیال سے حضور اقدس صلی اللہ علیہ وسلم کے پاک نام پر درود لکھنے میں چُوک ہو جاتی تھی۔

میں نے حضور اقدس صلی اللہ علیہ وسلم کی خواب میں زیارت کی، حضور اقدس صلی اللہ علیہ وسلم نے ارشاد فرمایا کہ جب تُو حدیث لکھتا ہے، تو مجھ پر درود کیوں نہیں لکھتا؛ جیسا کہ ابو عمرو طبری رحمہ اللہ لکھتے ہیں۔

میری آنکھ کھلی، تو مجھ پر بڑی گھبراہٹ سوار تھی۔ میں نے اسی وقت عہد کر لیا کہ اب سے جب کوئی حدیث لکھوں گا، تو ”صلی اللہ علیہ وسلم“ ضرور لکھوں گا۔ (القول البدیع، فضائل درود، ص ۱۶۷-۱۶۸)

يَا رَبِّ صَلِّ وَسَلِّم دَائِمًا أَبَدًا عَلَى حَبِيبِكَ خَيرِ الْخَلْقِ كُلِّهِمِ

Source: