حضرت سعید بن زید رضی اللہ عنہ کا بلند مقام‎ ‎

قال سعيد بن جبير رحمه الله: كان مقام أبي بكر وعمر وعثمان وعليّ وسعد وسعيد وطلحة والزّبير وعبد الرّحمن بن عوف رضي الله عنهم مع النّبي صلّى اللَّه عليه وسلم واحدًا، كانوا أمامه في القتال (يدافعون عنه صلى الله عليه وسلم ويحفظونه)، وخلفه (مباشرة) في الصلاة (أي: في الصف المتقدم) (الإصابة ٣/٨٧)

حضرت سعید بن جبیر رحمہ اللہ نے ایک مرتبہ ذکر کیا کہ رسول اللہ صلی اللہ علیہ وسلم کے ساتھ حضرت ابو بکر، حضرت عمر، حضرت عثمان، حضرت علی، حضرت سعد (بن ابی وقاص)، حضرت سعید (بن زید)، حضرت طلحہ، حضرت زبیر اور حضرت عبد الرحمن بن عوف رضی اللہ عنہم کا مقام ہر وقت یکساں تھا۔ جنگ کرتے وقت یہ حضرات ہمیشہ رسول اللہ صلی اللہ علیہ وسلم کے سامنے ہوتے تھے؛ (تاکہ وہ آپ کی حفاظت کریں) اور نماز کے وقت یہ حضرات (براہِ راست) آپ کے پیچھے کھڑے ہوتے تھے (یعنی وہ پہلی صف میں کھڑے ہوتے تھے)۔ (الاصابہ ۳/۸۷)

حضرت عبداللہ بن عمر رضی اللہ عنہ کی نظر میں حضرت سعید بن زید رضی اللہ عنہ کا عظیم مقام

ایک مرتبہ حضرت عبداللہ بن عمر رضی اللہ عنہما نماز جمعہ کے لیے گھر سے نکلنے کی تیاری کر رہے تھے ۔ اسی دوران انہوں نے سنا کہ ان کے چچا حضرت سعید بن زید رضی اللہ عنہ سخت بیمار ہیں اور موت کے قریب ہیں ۔ یہ خبر ان کو اس وقت پہنچی جب وہ اپنے جسم پر عطر لگا چکے تھے اور جمعہ کی نماز کے لیے اپنے گھر سے نکلنے والے تھے۔ مگر جب انہوں نے یہ خبر سنی تو فوراً اپنی سواری پر سوار ہو ئے  اور نماز جمعہ کے لیے جانے کے بجائے عقیق کی طرف روانہ ہو گئے جہاں حضرت سعید رضی اللہ عنہ سکونت پذیر تھے۔ عقیق شہر سے دور ایک ایسی جگہ تھی جہاں کے مکینوں پر جمعہ کی نماز  فرض نہیں تھی،  کیوں کہ وہاں جمعہ کی فرضیت کی شرائط نہیں پائی جاتی تھیں ۔ حضرت عبداللہ بن عمر رضی اللہ عنہ عقیق گئے اور حضرت سعید رضی اللہ عنہ کو غسل دیا ، کفن پہنایا اور ان کی نماز جنازہ میں  شریک ہوئے۔