عیادتِ مریض کی سنتیں‎ ‎اور آداب – ۲

عیادتِ مریض کے فضائل

ستر ہزار فرشتوں کی دعا کا حصول

حضرت علی رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: جو شخص صبح کو کسی بیمار کی عیادت کرتا ہے، اس کے لیے ستر ہزار فرشتے شام تک اللہ تعالیٰ سے رحمت کی دعا کرتے ہیں اور جو شخص شام کو کسی بیمار کی عیادت کرتا ہے، اس کے لیے ستر ہزار فرشتے صبح تک اللہ تعالیٰ سے رحمت کی دعا کرتے ہیں اور اس کو جنت میں ایک باغ ملےگا۔ (سنن الترمذي، الرقم: ٩٦٩)

جنت میں محل کی تعمیر

حضرت ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا کہ جب کوئی شخص کسی بیمار کی عیادت کرتا ہے، تو آسمان سے ایک فرشتہ پکارتا ہے کہ تم آرام وسکون سے رہو۔ تمہارا (اپنے بھائی سے ملاقات اور اس کی خبرگیری کے لیے) چلنا کتنا اچھا ہے اور (اِس عمل سے) تم نے جنت میں اپنے لیے ایک محل بنا لیا ہے۔ (سنن ابن ماجه، الرقم: ١٤٤٣، سنن الترمذي، الرقم: ٢٠٠٨)

اللہ کی رضا کا حصول

حضرت ابو ہریرہ رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا کہ قیامت کے دن اللہ تعالیٰ فرمائیں گے کہ اے آدم کے بیٹے! میں بیمار ہوا تھا؛ لیکن تو نے میری عیادت نہیں کی۔ وہ شخص جواب دےگا کہ اے اللہ! میں آپ کی عیادت کس طرح کرتا؛ جب کہ آپ دونوں جہانوں کے پروردگار ہیں؟ (اور آپ بیماری سے پاک ہیں) اللہ تعالیٰ فرمائیں گے کہ کیا تجھے معلوم نہیں تھا کہ میرا فلاں بندہ بیمار تھا اور تو نے اس کی عیادت نہیں کی۔ کیا تجھے معلوم نہیں تھا کہ اگر تو اس بیمار کی عیادت کرتا، تو مجھے (یعنی میری رضا کو) اس کے پاس پاتا۔ (صحيح مسلم، الرقم: ٢٥٦٩)