جمعہ کے دن درود شریف پڑھنے کی وجہ سے اسّی سال کے گناہوں کی معافی اور اسّی سال کی عبادتوں کا ثواب

‎

عن أبي هريرة رضي الله عنه قال: قال رسول الله صلى الله عليه وسلم: من صلى صلاة العصر من يوم الجمعة فقال: قبل أن يقوم من مكانه اللهم صل على محمد النبي الأمي وعلى آله وسلم تسليما ثمانين مرّة غفرت له ذنوب ثمانين عاما وكتبت له عبادة ثمانين سنة (القول البديع صـ 399)

حضرت ابو ہریرہ رضی الله عنہ سے روایت ہے کہ رسول الله صلی الله علیہ وسلم نے ارشاد فرمایا کہ جو شخص جمعہ کے دن عصر کی نماز کے بعد اپنی جگہ سے اٹھنے سے پہلے اسّی مرتبہ (مندرجہ ذیل درود) پڑھتا ہے، اس کے اسّی سال کے گناہ معاف کر دیئے جاتے ہیں اور اس کے لیے اسّی سال کی عبادتوں کا ثواب لکھا جاتا ہے:

اَللّٰهُمَّ صَلِّ عَلٰى مُحَمَّدٍ النَّبِيِّ الْأُمِّيِّ وَعَلٰى آلِهِ وَسَلِّمْ تَسْلِيْمًا

اے الله! محمد صلی الله علیہ وسلم جو نبی امیّ ہے ان پر خوب خوب درود وسلام بھیج اور ان کی آل واولاد پر بھی۔

قصیدہ بردہ کے مصنّف رحمہ اللہ کا واقعہ

علاّمہ بوصیری رحمہ الله ایک بڑے عالمِ دین اور الله کے ولی تھے۔ ایک مرتبہ ان پر فالج کا شدید حملہ ہوا، جس کی وجہ سے وہ چلنے پھرنے سے عاجز ہو گئے، تو انہوں نے نبی کریم صلی الله علیہ وسلم کی مدح وتوصیف میں ایک قصیدہ تیار کیا، جو قصیدہ بردہ کے نام سے مشہور ہے۔

انہوں نے اپنا مشہور قصیدہ بردہ اس امید کے ساتھ تیار کیا کہ رسول الله صلی الله علیہ وسلم کی مدح اور محبت میں کہے گئے یہ اشعار الله تعالیٰ کی رحمت حاصل کرنے اور ان کی بیماری سے شفا پانے کا ذریعہ بنیں گے۔

ایک شب کو انہوں نے رسول کریم صلی الله علیہ وسلم کو خواب میں دیکھا، انہوں نے آپ صلی الله علیہ وسلم کے سامنے اپنے اشعار کا مجموعہ پیش کیا، جس میں انہوں نے آپ صلی الله علیہ وسلم سے اپنی بے پناہ عقیدت ومحبّت کا اظہار کیا تھا، تو آپ صلی الله علیہ وسلم نے ان کے بدن پر اپنا دستِ مبارک پھیرا۔

آپ صلی الله علیہ وسلم کے مبارک ہاتھ کی برکت سے ان کو کامل شفا ملی؛ چنانچہ جب وہ خواب سے بیدار ہوئے، تو وہ پورے طور پر شفایاب ہوئے اور چلنے پھرنے پر قادر ہو گئے۔ (كشف الظنون ۲/۱۳۳۱)

‎يَا رَبِّ صَلِّ وَسَلِّم دَائِمًا أَبَدًا عَلَى حَبِيبِكَ خَيرِ الْخَلْقِ كُلِّهِمِ‎

‎Source: