فضائلِ اعمال – ۳۵

صحابہ کرام رضی اللہ عنہم کے تقوٰی کے بیان میں

حضرات صحابہ کرام رضی الله عنہم کی ہر عادت، ہر خصلت اس قابل ہے کہ اس کو چُنا جائے اور اس کا اتباع کیا جائے اور کیوں نہ ہو کہ الله جل شانہ نے اپنے لاڈلے اور محبوب رسول (صلی الله علیہ وسلم) کی مصاحبت کے لیے اس جماعت کو چُنا اور چھانٹا۔

حضور صلی الله علیہ وسلم کا ارشاد ہے کہ میں بنی آدم کے بہترین قرن اور زمانہ میں بھیجا گیا۔

اس لیے ہر اعتبار سے یہ زمانہ خیر کا تھا اور زمانہ کے بہترین آدمی حضور صلی الله علیہ وسلم کی صحبت میں رکھے گئے۔

حضور صلی الله علیہ وسلم کی ایک جنازہ سے واپسی اور ایک عورت کی دعوت

حضور اقدس صلی الله علیہ وسلم ایک جنازہ سے واپس تشریف لا رہے تھے کہ ایک عورت کا پیام کھانے کی درخواست لے کر پہنچا۔

حضور صلی الله علیہ وسلم خُدّام سمیت تشریف لے گئے اور کھانا سامنے رکھا گیا، تو لوگوں نے دیکھا کہ حضور اقدس صلی الله علیہ وسلم لقمہ چبا رہے ہیں، نِگلا نہیں جاتا۔

حضور صلی الله علیہ وسلم نے فرمایا: ایسا معلوم ہوتا ہے کہ اس بکری کا گوشت مالک کی بغیر اجازت لے لیا گیا۔

اس عورت نے عرض کیا: یا رسول الله! میں نے ریوڑ میں بکری خریدنے آدمی بھیجا تھا، وہاں ملی نہیں۔ پڑوسی نے بکری خریدی تھی، میں نے اس کے پاس قیمت سے لینے کو بھیجا، وہ تو ملے نہیں۔ اُن کی بیوی نے بکری بھیج دی۔

حضور صلی الله علیہ وسلم نے فرمایا کہ قیدیوں کو کھلا دو۔

ف: حضور صلی الله علیہ وسلم کی عُلوّ شان کے مقابلہ میں ایک مشتبہ چیز کا گلے میں اٹک جانا کوئی ایسی اہم بات نہیں کہ حضور صلی الله علیہ وسلم کے ادنٰی غلاموں کو بھی اس قسم کے واقعات پیش آجاتے ہیں۔ (فضائلِ اعمال، حکایاتِ صحابہ، ص ۶۷)

حضور صلی اللہ علیہ وسلم کا صدقہ کی کھجور کے خوف سے تمام رات جاگنا

ایک مرتبہ نبی اکرم صلی اللہ علیہ وسلم تمام رات جاگتے رہے اور کروٹیں بدلتے رہے۔

ازواج مطہرات میں سے کسی نے عرض کیا: یا رسول اللہ! آج نیند نہیں آتی؟

ارشاد فرمایا کہ ایک کھجور پڑی ہوئی تھی۔ میں نے اٹھا کر کھائی تھی کہ ضائع نہ ہو۔ اب مجھے یہ فکر ہے کہ کہیں وہ صدقہ کی نہ ہو۔

ف: اقرب یہی ہے کہ وہ حضور صلی اللہ علیہ وسلم کی اپنی ہی ہوگی؛ مگر چوں کہ صدقہ کا مال بھی حضور صلی اللہ علیہ وسلم کے یہاں آتا تھا، اس شبہ کی وجہ سے نبی اکرم صلی اللہ علیہ وسلم کو رات بھر نیند نہ آئی کہ خدا نخواستہ وہ صدقہ کی ہو اور اس صورت میں صدقہ کا مال کھایا گیا ہو۔

یہ تو آقا کا حال ہے کہ محض شبہ پر رات بھر کروٹیں بدلیں اور نیند نہیں آئی۔

اب غلاموں کا حال دیکھو کہ رشوت، سود، چوری، ڈاکہ ہر قسم کا ناجائز مال کسی سرخروئی سے کھاتے ہیں اور ناز سے اپنے کو غُلامانِ محمد شمار کرتے ہیں۔ (فضائلِ اعمال، حکایات صحابہ، ص ۶۶-۶۷)