تعزیت کی سنتیں اور آداب – ۱

مصیبت زدہ لوگوں کے ساتھ تعزیت

اسلام ایک جامع اور مکمل طرز زندگی ہے۔ اس میں انسان کی ہر ضرورت کا خیال رکھا گیا ہے؛ چناں چہ اسلام نے نہ صرف زندگی کے دوران سلامتی کا راستہ دکھایا ہے؛ بل کہ یہ بھی سکھایا ہے کہ اگر کسی انسان کا انتقال ہو جائے، تو اس کے مصیبت زدہ لوگوں کے ساتھ کس طرح محبت اور ہمدردی کا اظہار کیا جائے۔

لہذا حضرت رسول اللہ صلی اللہ علیہ وسلم نے اپنی اعلیٰ تعلیمات اور اسوہ حسنہ کے ذریعے امت کو سکھایا ہے کہ وہ مصیبت زدہ لوگوں کے ساتھ کس طرح تعزیت کرے اور انہیں کس طرح تسلی دے۔

چناں چہ ایک حدیث میں آیا ہے کہ رسول اللہ صلی اللہ علیہ وسلم نے فرمایا: جو شخص کسی مصیبت زدہ آدمی کو تسلی دےگا، تو اس کو مصیبت زدہ آدمی کے ثواب کے برابر ثواب ملےگا (یعنی وہ ثواب جو مصیبت زدہ آدمی کو مصیبت کے وقت صبر کرنے پر ملےگا، اس ثواب کے برابر تعزیت کرنے والے کو ملےگا)۔

ایک اور حدیث میں وارد ہے کہ رسول اللہ صلی اللہ علیہ وسلم نے فرمایا: جو بھی مومن اپنے مسلمان بھائی کے ساتھ کسی مصیبت کے وقت تعزیت کرے، تو اللہ تعالیٰ قیامت کے دن اس کو عزت کا لباس پہنائیں گے۔