فرشتوں کا نبی کریم صلی اللہ علیہ وسلم کی خدمت میں درود وسلام پہونچانا

عن ابن عباس رضي الله عنهما قال: ليس أحد من أمة محمد يصلي على محمد أو يسلم عليه إلا بلغه يصلي عليك فلان ويسلم عليك فلان (مسند إسحاق بن راهويه، الرقم: 911، رجاله ثقات إلا أبا يحيى القتات، ففيه ضعف.) (المطالب العالية، الرقم: 3333)

حضرت عبد اللہ بن عباس رضی اللہ عنہما نے ایک مرتبہ بیان کیا کہ محمد صلی اللہ علیہ وسلم کی امّت میں سے جو بھی شخص محمد صلی اللہ علیہ وسلم پر درود وسلام بھیجتا ہے، فرشتے اس کو نبی کریم صلی اللہ علیہ وسلم کی خدمت میں پہونچاتے ہیں اور عرض کرتے ہیں کہ فلاں ابن فلاں نے آپ پر سلام بھیجا ہے اور فلاں ابن فلاں نے آپ پر درود بھیجا ہے۔

حضرت رسول اللہ صلی اللہ علیہ وسلم کی قبرِ اطہر کے پاس ایک بدو کا آنا

اصمعی رحمہ اللہ کہتے ہیں کہ ایک بدو قبر شریف کے سامنے آ کر کھڑے ہوئے اور عرض کیا یا اللہ یہ آپ  کے محبوب ہیں اور میں آپ کا غلام اور شیطان آپ کا دشمن اگر آپ میری مغفرت فرما دیں، تو آپ کے محبوب صلی اللہ علیہ وسلم کا دل خوش ہو آپ کا غلام کامیاب ہو جائے اور آپ کے دشمن کا دل تلملانے لگے اور اگر مغفرت نہ فرمائے، تو آپ کے محبوب صلی اللہ علیہ وسلم کو رنج ہو اور آپ کا دشمن خوش ہو اور آپ کا غلام ہلاک ہو جائے۔

یا اللہ عرب کے کریم لوگوں کا دستور یہ ہے کہ جب ان میں کوئی بڑا سردار مر جائے، تو اس کی قبر پر غلاموں کو آزاد کیا کرتے ہیں اور یہ پاک ہستی سارے جہانوں کی سردار ہے، تو اس کی قبر پر مجھے آگ سے آزادی عطا فرما۔

اصمعی رحمہ اللہ کہتے ہیں کہ میں نے اس سے کہا کہ اے عربی شخص اللہ جل شانہ نے تیرے اس بہترین سوال پر (ان شاء اللہ) تیری ضرور بخشش کر دی۔ (فضائل حج، ص ۱۲۷)

حضرت ابو بکر صدّیق رضی اللہ عنہ کی خدمت نبی کریم صلی اللہ علیہ وسلم کے لیے

حضرت ابو بکر صدّیق رضی الله عنہ رسولِ کریم صلی الله علیہ وسلم کی معیّت میں سفرِ ہجرت کا واقعہ بیان فرماتے ہیں:

ہم رات بھر چلتے رہے اور دوسرے دن صبح کو بھی؛ یہاں تک کہ ٹھیک دوپہر کا وقت ہو گیا اور راستہ خالی ہو گیا، اس میں کوئی گذرنے والا دِکھائی نہیں دے رہا تھا۔

میں نے اِدھر اُدھر دیکھا کہ کوئی سایہ دار جگہ مل جائے؛ تاکہ ہم وہاں آرام کر سکیں، تو ہمیں ایک بڑی چٹان نظر آیی؛ جہاں ہم دھوپ سے بچنے کے لیے پناہ لے سکیں۔

پھر ہم چٹان کے پاس (اس کے سائے میں آرام کرنے کے لیے) رک گئے اور میں نے اپنے ہاتھوں سے زمین کو ہموار کیا؛ تاکہ رسول الله صلی الله علیہ وسلم وہاں لیٹ کر آرام کر سکیں۔

پھر میں نے چمڑے کی کھال بچھا دی اور آپ سے کہا کہ یا رسول الله (صلی الله علیہ وسلم)! آپ آرام فرمائیں، میں آپ کے ارد گرد کی جگہوں پر نظر رکھوں گا۔

جب رسول الله صلی الله علیہ وسلم آرام کرنے کے لیے لیٹ گئے، تو میں حالات کا جائزہ لینے کے لیے دیکھنے گیا کہ کیا میں کسی کو دیکھ سکتا ہوں، جو ہمیں ڈھونڈ رہا ہو، تو اسی اثنا میں مجھے ایک چرواہا نظر آیا، جس کے پاس کچھ بکریاں تھیں۔ وہ چٹان کی طرف آرہا تھا؛ تاکہ وہ بھی سائے میں آرام کرے، جیسا کہ ہم آرام کر رہے تھے۔

میں نے اس سے پوچھا کہ تمہارا مالک کون ہے؟ اس نے مجھے مکّہ مکرّمہ کے ایک شخص کا نام بتایا، جس سے میں واقف تھا (چوں کہ اس زمانہ کا دستور تھا کہ جانوروں کے مالکان مسافروں اور راہ گیروں کو اپنے جانوروں کا دودھ پینے کی اجازت دیتے تھے؛ اس لیے حضرت ابو بکر صدّیق رضی الله عنہ نے اس چرواہے سے دودھ مانگا)۔

حضرت ابو بکر صدّیق رضی الله عنہ فرماتے ہیں:

میں نے چرواہے سے سوال کیا کہ کیا تمہاری بکریوں میں دودھ ہے؟

اس نے کہا: ہاں۔

پھر میں نے کہا: کیا تم میرے لیے دودھ نکال سکتے ہو؟

اس نے کہا: ہاں۔

میں نے اس سے کہا کہ آپ اس بات کا اہتمام کریں کہ آپ پہلے بکری کے تھن کو دھو لیں اور انہیں غبار، بال اور دیگر گندگی سے صاف کریں۔

چرواہے نے ایک برتن میں ایک بکری کا دودھ نکالا اور میرے پیالے میں ڈال دیا۔ میں نے اس پیالے میں تھوڑا سا پانی ملایا؛ تاکہ وہ گرم دودھ تھوڑا ٹھنڈا ہو جائے، پھر میں دودھ لے کر رسول الله صلی الله علیہ وسلم کی خدمت میں حاضر ہوا۔

میں رسول الله صلی الله علیہ وسلم کو جگانا نہیں چاہتا تھا اور آپ کی نیند میں خلل نہیں ڈالنا چاہتا تھا؛ لیکن جب میں آپ کے پاس پہونچا، تو میں نے دیکھا کہ آپ بیدار تھے۔ میں نے عرض کیا: اے الله کے رسول! دودھ نوش فرمائیے۔

حضرت ابو بکر صدّیق رضی الله عنہ فرماتے ہیں کہ رسول الله صلی الله علیہ وسلم نے دودھ نوش فرمایا، جس سے مجھے بہت خوشی ہوئی۔ (بخاری، مسلم)

اس واقعہ سے حضرت ابو بکر رضی الله عنہ کی رسول الله صلی الله علیہ وسلم سے وہ عظیم محبت نظر آتی ہے کہ رسول الله صلی الله علیہ وسلم کو دودھ کا مزہ چکھتے دیکھ کر ان کے دل کو بہت خوشی ہوئی؛ جب کہ وہ خود دودھ نہیں پی رہے تھے اور خود اس سے مزہ نہیں لے رہے تھے۔

یہ محبت ماں کی محبت سے مشابہت رکھتی ہے کہ جب ماں بچے کو کھانا کھاتے ہوئے اور مزہ لیتے ہوئے دیکھتی ہے، تو وہ نظارہ خود اس کے دل کو خوشی دیتا ہے۔

يَا رَبِّ صَلِّ وَسَلِّم دَائِمًا أَبَدًا عَلَى حَبِيبِكَ خَيرِ الْخَلْقِ كُلِّهِمِ

 Source: