رسول اللہ صلی اللہ علیہ وسلم کے شاداں و فرحاں ہونے کا سبب

عن أبي طلحة الأنصاري رضي الله عنه قال: أصبح رسول الله صلى الله عليه وسلم يوما طيب النفس يرى في وجهه البشر قالوا: يا رسول الله ‏أصبحت اليوم طيب النفس يرى في وجهك البشر قال: أجل أتاني آت من ربي عز وجل فقال: من صلى عليك من أمتك صلاة كتب الله له عشر ‏حسنات ومحا عنه عشر سيئات ورفع له عشر درجات ورد عليه مثلها (سنن النسائى، الرقم: 1283، ورجاله موثقون كما في القول البديع صـ ‏‏248)‏

حضرت ابو طلحہ انصاری رضی الله عنہ سے روایت ہے کہ ایک دن صبح کے وقت رسول الله صلی الله علیہ وسلم ہمارے سامنے جلوہ افروز ہوئے اس حال میں کہ آپ شاداں و فرحاں تھے۔ چہرۂ انور پر خوشی کے آثار نمایاں تھے۔ صحابۂ کرام رضی الله عنہم نے عرض کیا: اے الله کے رسول صلی الله علیہ وسلم! آج آپ بہت خوش ہیں! آپ کے چہرہ پر خوشی کے آثار نمایاں ہیں۔ رسول الله صلی الله علیہ وسلم نے جواب دیا: ہاں (میں بہت خوش ہوں، چوں کہ) میرے پاس میرے رب کا پیغمبر آیا تھا، اس نے مجھ سے کہا کہ آپ کی امت میں سے جو بھی آپ پر ایک درود بھیجتا ہے، الله تعالیٰ اس کے لیے دس نیکیاں لکھتے ہیں، اس کے دس گناہوں کو مٹاتے ہیں، جنت میں اس کے دس درجات بلند کرتے ہیں اور اس کے درود کا اسی کی طرح جواب دیتے ہیں (اس کے درود کے بدلہ الله تعالیٰ اس پر رحمت نازل فرماتے ہیں)۔

درود کے ساتھ سلام بھی بھیجو

حضرت ابراھیم نسفی رحمہ الله کہتے ہیں کہ میں نے نبئ کریم صلی الله علیہ وسلم کی خواب میں زیارت کی۔

تو میں نے نبئ کریم صلی الله علیہ وسلم کو کچھ اپنے سے منقبض پایا، تو میں نے جلدی سے ہاتھ بڑھا کر نبئ کریم صلی الله علیہ وسلم کے دستِ مبارک کو بوسہ دیا اور عرض کیا: یا رسول الله صلی الله علیہ وسلم! میں تو حدیث کے خدمت گاروں میں ہوں، اہلِ سنت سے ہوں، مسافر ہوں۔

حضور صلی الله علیہ وسلم نے تبسّم فرمایا اور یہ ارشاد فرمایا کہ جب تو مجھ پر درود بھیجتا ہے، تو سلام کیوں نہیں بھیجتا؟

اس کے بعد سے میرا معمول ہو گیا کہ میں صلی الله علیہ وسلم لکھنے لگا۔ (فضائل درود، ص ١٦٣)

يَا رَبِّ صَلِّ وَسَلِّم دَائِمًا أَبَدًا عَلَى حَبِيبِكَ خَيرِ الْخَلْقِ كُلِّهِمِ

 Source: http://ihyaauddeen.co.za/?p=5588

Check Also

نبی کریم صلی اللہ علیہ وسلم کی شفاعت کا حصول ‏

”جس شخص نے میری قبر کی زیارت کی، اس کے لئے میری شفاعت ضروری ہو گئی“...